नेपाल टेलिकमको एनटी च्याटबोट सेवा शुरु, कसरी प्रयोग गर्ने ?

काठमाडौं। नेपाल टेलिकमले ‘एनटी च्याटबोट’ सेवा शुरु गरेको छ ।

नेपाल टेलिकमका विभिन्न सेवाहरु तथा सेवा प्रदान गर्ने विधिहरुको बारेमा कम्पनीको वेबसाइटबाटै च्याटमार्फत स्वचालित रुपमा जानकारी प्राप्त गर्न सकिने गरी एनटी च्याटबोट सेवा शुभारम्भ गरिएको बताइएको छ ।

कम्पनीको वेबसाइट खोल्नासाथ शुुरु पेजमा एनटी च्याटबोटको सानो स्क्रिन स्वचालित रुपमा देखा पर्दछ । त्यहाँ ‘निड हेल्प ?’ र ‘वेलकम टु एनटी च्याटबोट’ भनेर लेखिएको छ । त्यसबाट कम्पनीका विभिन्न सेवाहरुको बारेमा जानकारी लिनका लागि उपलब्ध विकल्पको छनोट गर्न तथा नेपाली वा अंग्रेजी भाषा छनोट गरी प्रश्न लेखेर जिज्ञासा राख्न सकिने कम्पनीको भनाइ छ ।

कम्पनीका विभिन्न सेवाहरु फोरजी, एफटीटीएच, जीएसएम प्रिपेड, जीएसएम पोस्टपेड, ल्यान्डलाइन, एनटी एप, अनलाइन रिचार्ज, अफर, प्याकेज आदिका बारेमा जानकारी प्राप्त गर्न सकिन्छ । त्यसैगरी विभिन्न सेवाहरुका बारेमा फिडब्याक दिन र सिकायत वा गुनासो समेत गर्न सकिन्छ । सिकायत वा गुनासोको सम्बोधन च्याटबोटमार्फत स्वचालित रुपमा हुन नसकेमा कम्पनीको सम्बन्धित विभाग वा पदाधिकारीले अध्ययन गरी गुनासो व्यवस्थापन गर्ने छन् ।

एनटी च्याटबोट सेवाले वेबसाइटमा राखिएका विवरणका आधारमा स्वचालित रुपमा जानकारी उपलब्ध गराउँछ । कम्पनीका सेवाग्राहीले कुनै सेवाका बारेमा थप जानकारी लिनुपरेमा एनटी च्याटबोटबाहेक कम्पनीका सामाजिक सञ्जालहरु फेसबुक, ट्विटर, भाइवर कम्युनिटी वा इन्स्टाग्राम प्रयोग गर्न सक्ने छन् । ग्राहकहरुले कम्पनीको ‘नेपाल टेलिकम एप’ बाट पनि सेवा तथा सुविधाहरुका बारेमा विभिन्न जानकारी प्राप्त गर्न सक्ने बताइएको छ ।

गत माघ २२ गते कम्पनीको १७औं वार्षिकोत्सवको अवसरमा माननीय एनटी च्याटबोट सेवाको शुभारम्भ गरिएको थियो ।