संविधान संशोधन विधेयक राष्ट्रपतिद्वारा प्रमाणीकरण

सभामुख अग्‍निप्रसाद सापकोटाले बिहीबार प्रमाणित गरेपछि उक्त विधेयक प्रमाणीकरणका लागि राष्ट्रपतिसमक्ष आजै पेश गरिएको थियो।

“आज मिति २०७७ साल असार ४ गते बिहीबारका दिन सम्माननीय राष्ट्रपति श्रीमती विद्यादेवी भण्डारीज्यूले संघीय संसदको दुवै सदनको बैठकबाट पारित भई प्रमाणीकरणकाे लागि पेश हुन आएको ‘नेपालको संविधान (दोस्रो संशोधन) विधेयक, २०७७’ नेपालको संविधानको धारा २७४ को उपधारा (१०) बमोजिम प्रमाणीकरण गर्नुभएको छ,” राष्ट्रपति कार्यालयका प्रवक्ता हरिप्रसाद दाहालले जारी गरेको विज्ञप्तिमा भनिएको छ।

उक्त विधेयक राष्ट्रिय सभाबाट बिहीबार र प्रतिनिधिसभाबाट ३१ जेठमा सर्वसम्मतिले पारित भएको थियो । सरकारले ७ जेठमा भारतीय अतिक्रमणमा परेका भू-भाग समेटेर नयाँ नक्शा जारी गरेको थियो भने ९ जेठमा संविधान संशोधनका लागि प्रतिनिधिसभामा दर्ता गरिएको थियो।