नेपाल आइपुगे भारतीय विदेश सचिव श्रीङ्गला

काठमाडौं । भारतीय विदेश सचिव हर्षवर्द्धन श्रीङ्गला दुई दिने नेपाल भ्रमणका क्रममा केही बेरअघि काठमाडौं आइपुगेका छन्। इन्डियन एयर फोर्सको विमानबाट उनी काठमाडौँ ओर्लिएका हुन्।

नेपालीभाषी विदेश सचिव श्रीङ्गलाको यो पहिलो नेपाल भ्रमण हो। परराष्ट्र सचिव भरतराज पौडेलको निमन्त्रणमा विदेश सचिव श्रीङ्गला नेपाल आएका हुन्। उनले समकक्षी पौडेलसँग आजै द्विपक्षीय वार्ता गर्ने कार्यक्रम छ।

उनले आजै राष्ट्रपति विद्यादेवी भण्डारी, प्रधानमन्त्री केपी शर्मा ओली, परराष्ट्रमन्त्री प्रदीप कुमार ज्ञवालीलगायतलाई भेट्ने छन्। उनी शुक्रबार ज्यापु समाजको भवन उदघाटन र गोर्खाको एक गुम्बा उदघाटन कार्यक्रममा सहभागी हुनेछन्। उनी शुक्रबार नै भारत फर्किने कार्यक्रम छ।